حكاية سلطان

فى زى الناس الماشيه فى الشارع

و قلبت فى نبرة صوتى

و حفظت أغانى نفاق

و أخدت دروس معهوده فى أصول الوطيان الجامد

و قلت خلاص

كده لازم آخد من سلطان البلد الأهبل حقى

و مانسيتش أجمع باقة زهر هديه لبنت السلطان المومس

ووقفت يجى شهر و أكتر فى طابور المساخيط الفقرا

و بصبر غريب علشان ما يروحش الدور

و أنول نظرة من السلطان كفيف القلب

و دخلت ....فوجئت

بإن ضميرى مايخلش عليه تلوين الوش

وأول ما وقفت أمام السلطان

خلعت الزيف

وضحكت

أترعب المرعب و اتلجم

طلعت من جيبى قزازة زفت ورميته على وشه المتكرمش

صرخ السلطان

... كان الزفت غطى ملامحه

واحتار العسكر

معلهش .. نسيت أوصف تضاريس غباء العسكر

ظنا منى ..

إن السادة المستمعين أعلم منى فى هذا المضمار

إحتار العسكر ...

و قالولى

فين السلطان ..؟

قولتلهم

ساب البلد المنكوبه و أخدله أجازه

صرخ السلطان المتزفت ...

ياولاد الكلب أنا السلطان

زادت حيرة عساكير الدرك الملاحيس

...وفى لحظة نور

قال ريسهم

سلطنا مش ممكن يتزفت

...وقبضوا عليه !