ياربنا .... انزل وحارب عنِّنَا
خلص الكلام ... ماعاد هناك كلام يتقال
ماهو احنا قلنا كل الكلام
كلام كتير
وكتير كلام
وكل واحد منِّنَا
حاطط دماغه فى السما
بيقول يارب
انزل وحارب عنِّنَا
التوهه زادت ف دْماغتنا كُلنا
هنقول يامين ؟!!!
يامُسلمين
يامْسَلِّمين
فيه اللى واقف ع الحدود
رافع رايتنا كلنا
ماعرفش يعملها ملك
أو كم رئيس
دولة تقول قمة مافيش
والتانية ماسكة فى اتفاقية سلام
سلام رخيص
حلو الكلام
دعوة ماليش
ومادام ماليش
مايهمنيش
غير انى أدعى زيُّكم
وأقول يارب
يالله قولوها كلكم
ياربنا
انزل وحارب عنِّنا
ياشعب واخد ع الكسل
نام ف العسل
مايهمنا
حُكَّامنا شالوا وِزْرِنا
قالوا شالوم يا أهل طوف
عايزين عيالنا بعدنا
تحمل ف أغصان الزتون
وتطير ترفرف فى الهوا زى الحمام
احنا حمائم للسلام
احنا الخروف
يااااااا ......... حاخام
ادبح براحتك ف القطيع
واحرق ف أكباد مسلمين
مِسَلِّمين
دا كل واحد منهم
حاطط دماغه ف السما
بيقول يارب
انزل وحارب عنِّنا
صدق الرسول
لسه احنا فى سفر الخروج
والأمريكان ويّا اليهود
بيخلّصوا فى رؤية يوحنا
خلاااااااااااااص